“கிழக்கில் உதித்த ஹிட்லர் மோடி”, “பைடன், மோடியின் பாசிசத்தை நிறுத்து” – இப்படிப்பட்ட முழக்கங்களால்தான் அமெரிக்க மனித உரிமை செயற்பாட்டாளர்கள் மோடியை வரவேற்கிறார்கள். வெள்ளை மாளிகைக்கு முன்பு போராட்ட ஏற்பாடுகளும் நடந்து வருகின்றன. ட்விட்டரில் “மோடியை வரவேற்கவில்லை” (#Modi_not_welcome) என்ற ஹாஷ்டாக் ட்ரெண்டாகி வருகிறது.
மோடியின் ஒன்பது ஆண்டுகால ஆட்சியில், பைடன் மோடியை இதுபோல் ஒரு அதிகாரப்பூர்வமான சந்திப்பிற்கு அழைத்திருப்பது இதுதான் முதல் முறையாகும். பைடனின் இந்த அழைப்பும், ஐ.நா.வில் மோடி யோகா செய்து காட்டுகின்ற நிகழ்வும் உலக அரங்கில் மோடி இந்தியாவிற்கு பெருமிதம் சேர்த்திருப்பதாக சங்கிகளால் இணைய வெளியில் ஓதிவிடப்படுகிறது.
பைடன் மோடி இடையிலான இந்தச் சந்திப்பில் ஆயுத உற்பத்தித் துறையில் இந்தியாவும் அமெரிக்காவும் நெருக்கமான கூட்டுறவை ஏற்படுத்துவது பற்றி பேசப்படலாம் என்று பத்திரிகைகள் செய்தி வெளியிடுகின்றன.
படிக்க : மோடியின் மௌன ஆசனம் | கேலிச்சித்திரம்
உண்மையில், அமெரிக்காவின் ஒற்றைத் துருவ உலக மேலாதிக்கத்திற்கு சீனாவும் ரஷ்யாவும் சவாலாக தோன்றியுள்ள இன்றைய உலகச் சூழ்நிலையில், சீனாவுக்கு எதிராக இந்தியாவை கொம்பு சீவி, தன்னுடைய ஆதிக்கக் கால்களை பசுபிக் கடல் பிராந்தியத்தில் நிலை நிறுத்திக் கொள்வதற்காக “தென்கிழக்கு ஆசியாவின் உக்ரைனாக” இந்தியாவை மாற்றும் சதி திட்டத்தின் ஒரு அங்கம்தான் பைடனின் அழைப்பு.
அமெரிக்கப் பெரியண்ணனின் அதிகாரத்துவ அழைப்பை சிரம்தாழ்ந்து ஏற்று ஓடோடிப் போகும் மோடியின் நடவடிக்கையை தேசப் பெருமிதமாக சங்கிகள் முன்னிறுத்திக் கொண்டிருக்க, அதற்கும் ஆப்பு வைத்துவிட்டார்கள் அமெரிக்க மனித உரிமை செயல்பாட்டாளர்கள்.
இஸ்லாமிய மக்களை நான்காம்தர குடிமக்களாக்கி இந்துத்துவ பாசிசத்தை திணித்துவரும் மோடி “கிழக்கின் ஹிட்லர்” மட்டுமல்ல, மணிப்பூர் பற்றி எரிந்து கொண்டிருக்கையில் அதைப்பற்றி ஒரு வார்த்தை வாயைத் திறந்து பேசாமல், கண்டும் காணாமல் அமெரிக்காவுக்கு ஓடிப்போன மோடி “இந்தியாவின் நீரோவும்” கூட!
